|
Messaġġ tas-Segretarju Ġenerali tan-Nazzjonijiet Uniti, għall-Jum Internazzjonali taż-Żgħażagħ, nhar it-12 t’Awwissu 2008 |
 |
 |
 |
Messaġġ tas-Segretarju Ġenerali tan-Nazzjonijiet Uniti, Ban Ki Moon għall-Jum Internazzjonali taż-Żgħażagħ, nhar it-12 t’Awwissu 2008.
Minkejja li x-xjenza tal-bidla fil-klima hi kumplessa, il-fatti huma ċari: id-dinja dieħla f’inkwiet. Is-sena l-oħra, meta żort l-Antartika, rajt b'għajnejja stess silġ li ilu ffriżat għal eluf ta’ snin idub ħafna aktar malajr milli konna naħsbu. Jekk il-bidla fil-klima ma tkunx indirizzata, din tista’ twassal biex il-progress li sar, ħalli jintlaħqu l-Għanijiet tal-Iżvilupp tal-Millennju, jisfaxxa fix-xejn. Il-bidla fil-klima jista' jkollha wkoll implikazzjonijiet serji għall-paċi u għas-sigurtà. Jekk ma ssirx bidla radikali fil-mod tal-għajxien tagħna, meta ż-żgħażagħ tal-lum (2008) ikollhom l-età tiegħi, id-dinja tista' tkun diġà saret post li ma tistax tgħix aktar fih.
It-tema li se nimxu biha din is-sena għall-Jum Internazzjonali taż-Żgħażagħ hi “Iż-Żgħażagħ u l-Bidla fil-Klima: Żmien ta’ Azzjoni”. Iż-żgħażagħ tal-lum se jkollhom ibatu l-konsegwenzi tal-bidla fil-klima, tort tal-ġenerazzjonijiet ta’ qabilhom. F'ħafna pajjiżi żviluppati, b’mod partikolari ż-żgħażagħ - u b’mod speċjali l-bniet u t-tfajliet - spiss ikunu responsabbli mill-biedja, mit-tiftix għall-ilma u mill-ġbir tal-injam li jista’ jitqabbad. Dawn ix-xogħlijiet se jsiru aktar diffiċli - u se jnaqqsu mill-ħin għall-edukazzjoni jew għall-attivitajiet produttivi - hekk kif il-bidla fil-klima taffettwa d-disponibbiltà tal-ilma, il-produttività agrikola u l-ħajja fl-ekosistemi.
Minkejja dan, minn issa, iż-żgħażagħ jistgħu jagħtu wkoll l-għajnuna tagħhom. Dawn kapaċi jmexxu drawwiet u teknoloġiji ġodda. Kapaċi jaddattaw ruħhom malajr u jistgħu jgħixu stil ta’ ħajja u jagħżlu karriera b’inqas użu tal-karbonju fil-ħajja tagħhom ta' kuljum. Għaldaqstant iż-żgħażagħ għandhom jingħataw iċ-ċans li jieħdu sehem attiv fit-teħid tad-deċiżjonijiet fuq livell lokali, nazzjonali u globali. U jistgħu jgħinu b’mod attiv f'inizjattivi li jwasslu għal leġiżlazzjonijiet diffiċli.
Hekk kif id-dinja qed tfittex li tħaddan forom ta’ enerġija aktar sostenibbli u nodfa, li jinkludu r-riżorsi rinovabbli, neħtieġu bil-kbir l-ispirtu żagħżugħ. Il-bidla għal ekonomija li tiddependi minn inqas karbonju, li nittamaw li ż-żgħażagħ ifittxu matul ħajjithom, toffri opportunitajiet kbar ħafna. Barra minn hekk, it-tkabbir ekonomiku bis-saħħa ta’ enerġija nadifa u innovazzjoni teknoloġika joħloq impjiegi li jistgħu jgħinu biex itaffu l-problema globali u kerha tal-qgħad fost iż-żgħażagħ.
F’dan il-Jum Internazzjonali taż-Żgħażagħ, inħeġġeġ liż-żgħażagħ minn madwar id-dinja kollha biex jinvestu l-enerġija u l-ideat oriġinali tagħhom biex jiffurmaw dinja aktar sigura u sostenibbli.
|
|
|
|
Bejn il-Ġimgħa 25 u l-Ħadd 27 ta' Lulju sar live-in, għall-parteċipanti teen youths. Il-live in sar Marsaxlokk u kien ta' opportunita` biex il-parteċipanti saru jafu aktar lil xulxin. Apparti minn hekk, il-Partiti bdew jiltaqgħu, jiffurmaw ruħhom u jiddiskutu s-suġġetti rispettivi tagħhom. 
Nhar il-Ġimgħa 11 ta' Lulju sar it-tieni seminar: din id-darba għall-parteċipanti minn 13 sa' 17-il sena. Is-seminar sar l-NCC u għal darb'oħra kien seminar fejn il-parteċipanti li attendew saru jafu lil xulxin permezz ta' xi workshops li saru.